VAŠINGTON - Američki predsjednik Barak Obama podijelio je novac od svoje Nobelove nagrade za mir između deset humanitarnih organizacija.
Četiri mjeseca nakon što je primio prestižnu nagradu od Nobelovog komiteta u Oslu, Obama je održao obećanje da će novčani iznos nagrade od 1,4 miliona dolara dati u dobrotvorne svrhe, navela je juče Bijela kuća.
Najveća suma, odnosno 250.000 dolara, dodijeljena je američkoj nevladinoj organizaciji "Fišer haus", koja obezbjeđuje smještaj porodicama bivših boraca iz Iraka i Avganistana na liječenju u vojnim bolnicama. Novac su dobile i "Fondacija za Haiti", kao i šest nevladinih organizacija koje pomažu pripadnicima manjinskih zajednica u SAD da steknu visokoškolsko obrazovanje.
I za nevladinu organizaciju "Afriker", koja rukovodi humanitarnim projektima u podsaharskoj Africi, i Institut za srednju Aziju, koji se bori protiv nepismenosti u Avganistanu i Pakistanu, takođe su izdvojene određene sume.