Gdje živi Djed Mraz? Kako uspijeva doći do svih nas u jednoj noći? Gdje se prave igračke i kako izgledaju njegovi pomoćnici? A kako ulazi u kuću i ostavlja poklone?
Ova i mnoga druga pitanja postavili smo mališanima, koji su nas svojim maštovitim odgovorima nasmijali i iznenadili.
Matija je bio dobar cijele godine i od Djeda Mraza očekuje trubu. Luka je siguran da Djed Mraz dolazi sa Sjevernog pola, gdje je jako hladno, i nada se da će se uspjeti provući kroz dimnjak.
Pogledajte video:
Filip, pak, tvrdi da Djed Mraz ne postoji, jer ne razumije kako dolazi do djece koja žive u zgradama bez dimnjaka.
Mi smo, ipak, sigurni da je sve to čista novogodišnja magija ona koja donosi radost, osmijehe i najljepše priče, baš kao i ove koje su nam ispričali naši mali sagovornici.
Gdje živi Djed Mraz?
Elena: Na Sjevernom polu.
Luka: On živi na Sjevernom polu, gdje je jako hladno i tamo ima pingvina.
Kako Djed Mraz leti?
Ana: On leti sa svojim sankama i irvasima, a ja sam ih čak i vidjela. Oni lete sa čarobnim prahom, a ja sam čak vidjela i vilu kako im pomaže da lete, jer je oko njih bio čarobni prah.
Matija: On ide sa sankama i irvasima, a njegovi irvasi imaju supermoć.
Filip: Na nebu postoji nevidljiva ulica preko koje oni lete.
Dunja: Djed Mraz se sigurno dogovorio s mađioničarom da mu on pomogne da leti.
Kako Djed Mraz ulazi u kuću?
Dunja: On ulazi kroz dimnjak, ali mi nije jasno kako ulazi, jer je on malo deblji i ima stomak. Kako se provuče?
Matija: Siguran sam da se popne na krov i uđe kroz dimnjak.
Filip: Meni nije jasno kako Djed Mraz postoji. Kako može ući u kuću djece koja žive u zgradi, ako zgrada nema dimnjak? Ne može ući na vrata. Meni je sve to malo čudno.
Matija: Ma, on se sigurno smanji.
Luka: On sigurno dolazi ako su mama i dijete lijepo sredili kuću. Nije bitno kako.
Jeste li pripremili poklone za Djeda Mraza?
Ana: Mi smo napravili kuću od čokolade koju ćemo staviti na prozor, pa će oni doći da to pojedu.
Elena: Ja mislim da ćemo ipak mi to pojesti.
Gdje se prave igračke?
Una: U mašini kod Djeda Mraza.
Matija: Ne prave se u mašini, nego ih prave neki ljudi, možda vilenjaci.
Šta biste poručili nama odraslima?
Dunja: Ja bih tebi, teto, poručila jedan mali pomfrit, a čiki bih poručila jedne nuggetse.
Da li Grinč postoji?
Dunja: Da, u filmovima, ali, on u stvarnosti ne postoji. Moja drugarica je vidjela samo kostim, nije baš sladak.
Luka: On je prije bio zločest, ali je na kraju postao dobar. Ima svog psa Maksa, koji je žute boje i nosi šal. Napravio je sanke.
Filip: Zeleno odijelo.
Kako se zovu pomoćnici Djeda Mraza?
Una: On dolazi sa sankama i pomaže Djedu Mrazu da dođe do nas. To su vilenjaci koji njemu pomažu.
Filip: Ima vilenjake, oni njemu sigurno pomažu oko svega.
Elena: On sa svojim vilenjacima pomoćnicima radi sve, jedan se zove Rudolf.
Šta želite od Djeda Mraza za Novu godinu?
Matija: Ja želim trubu, bio sam dobar.
Dunja: Ja želim jedno jaje sa jednorogom.
Arsenije: Ja želim tetovažu sa fudbalskim klubom, jer ja mnogo volim fudbal.
