Animirana televizijska komedija "Simpsonovi" postavila je novi rekord jer je u nedjelju naveče emitovana njihova 500. epizoda, u kojoj je gostovao osnivač internet stranice Vikiliks Džulijan Asanž.
On je pozajmio glas svom animiranom dvojniku na molbu autora serije Meta Groninga, koji je čuo da je kontroverzni australijski aktivista veliki fan njegovih junaka.
Televizija Fox je saopštila da je Asanž glas snimio u Londonu, gdje se i dalje nalazi u pritvoru, nakon žalbe na odluku britanskog suda da ga izruči Švedskoj, gdje ga čeka suđenje za silovanje dvije žene, što on negira.
"On je očigledno kontroverzna ličnost i o tome smo raspravljali prije nego što smo se dogovorili da ga pustimo da to uradi. Ali, to je zabavna uloga koja ne donosi nikakav sud o njegovom širem slučaju", kazao je Al Džin, izvršni producent serije.
Asanž je posljednja u nizu poznatih ličnosti koje su "glumile" u ovoj hit seriji, a među kojima su Elizabet Tejlor, astronaut Baz Oldrin, osnivač "Playboya" Hju Hefner i bivši britanski premijer Toni Bler.
U 500. epizodi Simpsonovi sele iz Spingfilda nakon što gradonačelnik objavljuje rezultate referenduma za protjerivanje omražene porodice iz grada. Oni dolaze na selo, gdje im je prvi komšija Asanž.
"To je dirljiva priča o porodici koja otkriva šta njeni susjedi zaista misle o njoj, a to što misle nije dobro, te moraju s tim da se suoče", objasnio je Džin.
Serija "Simpsonovi", satirična parodija načina života američkog srednjeg staleža, prvi put je prikazana 1989. godine.
Popularna animirana serija emituje se već 23 sezone, što je čini najdugotrajnijim i jedanim od najgledanijih američkih sitkoma, koji je tokom ove sezone u prosjeku gledalo oko 7,7 miliona ljudi.
Emituje se u više od 100 zemalja na 50 jezika.
Prema ugovoru, serija će biti snimana još dvije sezone, čime će imati ukupno 559 epizoda.
Priče o Homeru Simpsonu i njegovoj disfunkcionalnoj porodici, ženi Mardž i djeci Bartu, Lisi i Megi, postali su jedan od simbola američke kulture.
"Simpsonovi" su osvojili 27 "Emmy" nagrada, imaju svoju zvijezdu na Bulevaru slavnih u Los Anđelesu, a jedna od Homerovih uzrečica "D'Oh" ušla je u Oksfordski rječnik engleskog jezika.