"Ako želite da vodite rat protiv francuske umjetnosti i stila života, oni će vam dovesti Sartra, Edit Pjaf, dobro vino i cigarete Goloaz. Razbiće vas", rekao je engleski humorista Džon Oliver
Raznim kulturnim manifestacijama ovog vikenda se u Francuskoj obilježava 100 godina od rođenja ikone francuske šansone Edit Pjaf, čiji glas i riječi pjesama pogađaju publiku širom svijeta.
"Više od sadržaja pjesama, njen glas uvijek je mogao da gane i uzbudi ljude širom planete. Njen glas pobjeđuje vrijeme i granice i dirljivo je konstatovati da je ta mala iz Belvila i dalje aktuelna, u trenutku kada zemlja prolazi kroz pravu tragediju", rekao je biograf Edit Pjaf, Robert Belre poslije terorisitčkih napada u Parizu 13. novembra, u kojima je stradalo 130 osoba i povrijeđeno više od 350.
Edit Pjaf rođena je 19. decembra 1915. godine u kvartu Belvil u Parizu, gdje je u jednoj crkvi danas u njen pomen održana misa, a tokom cijelog vikenda biće joj odata počast širom Francuske, između ostalog u pariskoj Filharmoniji.
Odmah poslije terorističkih napada u Parizu, mnogi umjetnici iskoristili su pjesme Edit Pjaf kako bi odali poštu žrtvama, a među njima je Madona, koja je na koncertu u Stokholmu otpjevala "La vie en rose". U Los Anđelesu isto je učinila Selin Dion koja je interpretirala pesmu "L'hymne à l'amour".
Fudbalski klub Tigrovi iz Meksika je poslije minuta ćutanja za žrtve najvećeg terorističkog napada u istoriji Francuske pustio "La vie en rose", a na društvenim mrežama masovno su objavljivani djelovi pjesme "Sous le ciel de Paris" i "Je ne regrette rien".
"Ako želite da vodite rat protiv francuske umjetnosti i stila života, oni će vam dovesti Sartra, Edit Pjaf, dobro vino i cigarete Goloaz. Razbiće vas", rekao je engleski humorista Džon Oliver.
Edit Pjaf je simbol pariškog uha i bratstva običnih ljudi u Parizu, kaže Belre.
"Ona nije uvijek išla putem koji se smatra ispravnim, ne možemo je smatrati nekim ko sa sobom nosi francuske vrijednosti. Ali ona jeste glasnik, jer je imala tu vatru i strast da se svojim pozivom bavi do krajnih granica svojih snaga", rekao je on.
Osim Šarla Aznavura, Edit Pjaf je jedina među francuskim muzičarima koja je doživjela tako veliku slavu, a od 10. oktobra 1963. godine, kada je umrla, njena slava nije umanjena.
