VARŠAVA - Poljsko vojno tužilaštvo demantovalo je danas medijski izvještaj o tome da su istražitelji pronašli tragove eksploziva na olupini aviona u čijem je padu 2010. godine poginuo predsjednik Leh Kačinjski i još 95 ljudi.
Ireneuš Šelag, portparol vojnog tužilaštva, izjavio je da stručnjaci koji su pregledali olupinu prošlog mjeseca u Rusiji nisu pronašli ostatke eksploziva.
On je rekao da su na dijelovima olupine pronađene hemijske supstance koje će biti ispitane u laboratoriji. Rezultati će biti poznati za nekoliko mjeseci, prenio je AP.
Šelag je naglasio da nije tačno pisanje lista "Žečpospolita" da su tragovi eksploziva pronađeni na ostacima aviona.
List je pisao, bez citiranja izvora, da su tragovi TNT-a i nitroglicerina otkriveni na krilima i 30 sjedišta u kabini, kao i u oblasti u blizini Smolenska gdje je pao avion tipa "Tu-154".
Ruski istražitelji objavili su da su da je za nesreću kriva poljska posada koja je pokušala da sleti po gustoj magli. Poljski istražitelji smatraju da kontrola leta nije smjela da dozvoli avionu pokušaj slijetanja.
Pojedine građanske grupe u Poljskoj i glavna opoziciona Stranka zakona i pravde, odbacili su zaključke istražitelja i smatraju da je pad aviona možda bilo ubistvo predsjednika Kačinjskog i političkih i vojnih lidera koji su putovali s njim.