Vjerujem da ima više argumenata kojima bi mogla biti dovedena u pitanje odluka FIFA, rekao je Davor Prtenjača, advokat Josipa Šimunića, koji je već uložio žalbu na odluku svjetske kuće fudbala da suspenduje defanzivca 10 utakmica zbog skandiranja "Za dom spremni".
Šimunić je bio šokiran kaznom koju mu je FIFA izrekla zbog skandiranja pomenutog ustaškog slogana poslije revanš meča s Islandom u baražu za plasman na Svjetsko prvenstvo.
Iskusni defanzivac nakon kazne ne samo da neće moći da igra nego čak ni kao navijača neće moći da bude na tribinama u Brazilu. Zbog toga je odlučio da se žali i ne da traži smanjenje kazne, već njeno ukidanje.
"Podnio sam žalbu FIFA, u kojem tražimo obrazloženje odluke kojom Šimunića kažnjava sa 10 utakmica suspenzije i 30.000 švajcarskih franaka. Takođe, zatražio sam uvid u spis, jer želim da vidim ko ga je prijavio i s kojom argumentacijom. Imamo četiri ili pet ključnih argumenata kojima možemo da pobijemo odluku FIFA", izjavio je Prtenjača, a prenose mediji u Hrvatskoj.
Da je Šimunićev postupak pokrenuo lavinu moglo je da se vidi i u srijedu na revanš meču četvrtfinala Kupa Hrvatske između Hajduka i Dinama (1:2). Kako prenosi Index.hr, "Torcida" i "Bed blu bojsi" su, uz već tradicionalo skandiranje "HNS pederi" i "Mamiću, Cigane", ubacili i "Za dom spremni". Zbog spomenutih ustaških povika, utakmica je dva puta kratko prekinuta, ali ozbiljnijih incidenata nije bilo, prenosi ovaj portal. Ovo nije prvi put da se na tribinama zaorio pomenuti ustaški poklič, jer je to moglo da se čuje i na utakmici u Zagrebu između ova dva rivala. Da su navijači Hajduka najglasniji u podršci Šimuniću pokazali su i u novembru, u meču protiv Osijeka, kada su mediji u Hrvatskoj prenijeli da se cijeli "Poljud" orio uzvicima "Za dom spremni" i da je takvo navijanje propraćeno aplauzima svih navijača.
Nakon što je FIFA objavila kaznu, isti dan su hrvatski navijači na Facebook stranici svjetske kuće fudbala na svaku vijest ostavljali komentar "Za dom spremni".