DORČESTER - Igrač engleskog niželigaša Dorčestera Ešli Vikers isključen je u 70. minutu utakmice protiv Havanta i Voterluvila zato što je "uklizao" navijaču koji je utrčao na teren, prenijeli su engleski mediji.
U trenutku kada je Vikers morao da napusti igralište rezultat je bio 1:1, a njegov tim koji je bio gost u ovom meču, na kraju je poražen sa 3:1.
"Smiješno je to što su mi se redari zahvalili na pomoći, a sudija me je i pored toga isključio", rekao je Vikers koji u Dorčesteru ima ulogu trenera-igrača.
Navijač koji je istrčao na teren na sebi je imao samo zeleni tanga donji veš i crnu kovrdžavu periku.
Uprava Havanta i Voterluvila dodijelila mu je zabranu ulaska na stadion zbog ovog ispada.