Mjuzikl "Knjiga Mormona", autora TV serije "South Park", osvojio je u nedjelju naveče u "Bikon" pozorištu na Brodveju devet pozorišnih nagrada "Tony", uključujući nagradu i za najbolji mjuzikl.
Domaćin dodjele nagrada bio je glumac Nil Patrik Haris, koji je počeo šou pjesmom o Brodveju i nastavio sa šalama na račun glavnih nominovanih. Trej Parker i Met Ston, tvorci "South Parka" našli su srodnu dušu u Robertu Lopezu, koji je napisao "Tonyjem" nagrađeni komad "Avenija Kju" i njihov komad u kojem se blago podsmijavaju Mormonima i koji je osvojio Brodvej.
Šou o dvojici mormonskih misionara u Ugandi dobio je nagrade za najbolji mjuzikl, najbolju knjigu, najbolju režiju mjuzikla, najbolju muziku, najbolju glumicu i četiri tehničke nagrade. Mjuzikl je imao 14 nominacija i bio je glavni favorit na ovogodišnjoj dodjeli nagrada.
"Ratni konj", priča o vojniku iz Prvog svjetskog rata koji traga za svojim konjem, ispričana uz pomoć lutaka i glumaca, osvojio je pet "Tonyja", uključujući i nagradu za najbolji komad.
Po tri "Tonyja" dobili su "Normalno srce" i "Sve može".
Mark Rajlens proglašen je za najboljeg glumca za svoju snažnu ulogu Džonija "Rustera" Bajrona u komadu "Jerusalim".
Norbert Lio Buc je najbolji glumac u mjuziklu, a glumi FBI agenta u komadu "Uhvati me ako možeš".
Saton Foster, koja se pojavljuje u mjuziklu Kola Portera "Sve može", proglašena je za najbolju glumicu u mjuziklu, dok je Frensis Mekdormand najbolja glumica za ulogu radnice koja se ponovo nalazi sa bivšom simpatijom iz srednje škole u komadu "Dobri ljudi".
Nagrada za najbolju režiju mjuzikla pripala je Kejsiju Nikolau i Treju Parkeru za "Knjigu Mormona", dok su Marijen Eliot i Tom Moris nagrađeni za najbolju režiju pozorišnog komada za "Ratni konj".
Nagrade su ove godine dodijeljene u "Bikon" pozorištu na Brodveju, jer je dugogodišnje mjesto održavanja "Radio Siti mjuzik hol" zauzela pozorišna trupa "Cirque du Soleil".