MOSKVA - Viktor Janukovič obratio se danas izjavom narodu Ukrajine ističući da i dalje sebe smatra legalnim predsjednikom Ukrajine, javila je ruska agencija Itar-Tas.
"Ja, Viktor Fjodorovič Janukovič obraćam se narodu Ukrajine. I dalje sebe smatram zakonitim šefom ukrajinske države, izabranim na osnovu slobodnog izražavanja volje ukrajinskih građana", navedeno je u izjavi dostavljenoj ruskoj državnoj agenciji.
Ističući da ne može da bude isključen iz tragičnih događaja u Ukrajini, Janukovič je naveo da Sporazum o rešavanju krize koji su on i lideri ukrajinske opozicije u prisustvu zapadnih partnera potpisali 21. februara nije ispunjen.
Prema njegovim riječima, sve što se sada događa u Vrhovnoj radi (skupštini) Ukrajine nelegitimno je.
Janukovič je zatražio od Rusije da mu osigura ličnu sigurnost i da ga zaštiti od ekstremista, navedeno je u izjavi.
Janukovič u sanatorijumu kod Moskve?
Opozvani ukrajinski predsjednik Viktor Janukovič, nalazi se u jednom sanatorijumu Kremlja kod Moskve, objavila je ugledna ruska informativna agencija RBK.
Dok je Zapad priznao novu ukrajinsku vladu, čije su snage proterale Janukoviča iz Kijeva, Rusija ga i dalje smatra legitimnim predsjednikom.
RBK javlja da Janukovič boravi u sanatorijumu Barviha, kojim upravlja odijeljenje predsjedničke administracije za nekretnine.
Portparol ovog odeljenja Viktor Hrekov je danas za AP izjavio da nema informaciju o tome.
RBK tvrdi da je ova informacija potekla od jednog od najbogatijih ruskih biznismena, a to je potvrdio i zvaničnik vlade, ali nije navedeno ime ni jednog ni drugog.
Ispod vijesti su potpisani ugledni novinari, među kojima je i glavni i odgovorni urednik RBK.