KIJEV - SAD danas nisu u potpunosti potvrdile da privremenog lidera Oleksandera Turčinova smatraju legitimnim predsjednikom.
Navode da ukrajinski predsjednik Viktor Janukovič, koga je opozvao parlament, "trenutno ne vodi zemlju aktivno" i da Bijela kuća nema potvrdu gdje se on nalazi.
Janukovič se navodno nalazi na Krimu, proruskoj oblasti Ukrajine, preneo je AP.
Predstavnik Bijele kuće Džej Karni je rekao da Bijela kuća smatra da je ukrajinski parlament "zakonski izabrao svog novog predsjednika" i da podržava napore da se politička situacija stavi pod kontrolu i obezbijedi rad vladinih institucija.
Na pitanje da li SAD smatraju time Turčinova legitimnim vođom Ukrajine, Karni je odgovorio da Vašington smatra da je "on izabrani vođa parlamenta", preneo je AP.
Turčinov je inače predsjednik ukrajinske Vrhovne rade (skupštine), koji je privremeno preuzeo dužnosti predsjednika države nakon što je u parlamentu izglasan opoziv Janukoviča i što su raspisani parlamentarni izbori za 25. maj.
Karni je rekao da su SAD preokupirane promovisanjem nenasilnog procesa u Ukrajini koji bi rezultirao višestranačkom tehnokratskom vladom, koja bi mogla da pomogne u naporima u cilju održavanja prijevremenih izbora.
On je istakao da SAD vjeruju da predsjednik Rusije Vladimir Putin, s kojim je njegov američki kolega Barak Obama razgovaro o ukrajinskoj krizi u petak, ima interes da obezbijedi mirnu tranziciju vlasti u Kijevu.
"Nema protivrječnošti u tome da Ukrajina i ukrajinski narod odluče da idu u dalje evropske integracije, a da pri tom zadrže snažne istorijske i ekonomske odnose s Rusijom. Smatramo da je to sasvim odgovarajuće", rekao je on.
Ruski premijer Dmitrij Medvedev izjavio je ranije danas da njegova vlada gaji ozbiljne sumnje u legitimitet onih koji su došli na vlast u Ukrajini nakon opoziva Janukoviča, dodajući da činjenica da su neke države, između kojih i Evropska unija, priznale takvo stanje predstavlja "odstupanje od normale".