NJUJORK - Nedavne akcije američke vojske protiv Iranaca u Iraku odobrio je američki predsjednik Džordž Buš, ali one ne znače proširenje konflikta, izjavila je američki državni sekretar Kondoliza Rajs.
`Buš je izdao takvu naredbu prije nekoliko mjeseci`, rekla je Rajsova, pred posjetu Bliskom istoku, i ona je generalno povezana s februarskom ofanzivom SAD protiv šiitskih milicija i sunitskih pobunjenika u Iraku.
Rajsova je rekla da je američki predsjednik odobrio hajku na iranske operativce pošto su obavještajne službe, duže vrijeme, upozoravale na njihovu pojačanu aktivnost, ali i smrtonosnost djelovanja. Vojnici SAD su prije nekoliko dana uhapsili čak pet navodnih iranskih diplomata na sjeveru države, tvrdeći da te osobe nemaju diplomatske pasoše, te da su se nalazili u zgradi koja nije zvanično diplomatsko predstavništvo. Dio američkih optužbi odnosi se i na kreiranje eksplozivnih naprava koje Iračani postavljaju pokraj saobraćajnica i koje su u posljednje dvije godine odnijele ozbiljan danak u krvi među trupama iz SAD. Istovremeno, Teheran optužuju i za naoružavanje Mahdi milicije radikalnog šiitskog lidera Moktade al Sadra i razvoj nuklearnog naoružanja.
Rajsova je, stoga, rekla da su akcije protiv Iranaca, suštinski, samo sredstvo zaštite američkih snaga.
Priznanje Rajsove da SAD vode posebnu akciju protiv Irana uslijedilo je svega nekoliko dana pošto je portparol Bijele kuće Toni Snou izjavio da su priče o tobožnjim planovima za napad na Iran samo `urbana legenda`.