RIO DE ŽANEIRO - Žestoki neredi izbili su sinoć u Rio de Žaneiru kada su grupe anarhista počele da uništavaju banke i javne zgrade, poslije demonstracija na kojima se okupilo više od 10.000 ljudi u znak podrške učiteljima koji traže veće plate.
Uzvikujući "Vlada pada", hiljade demonstranata, profesora i ljudi koji su im pružali podršku mirno su prošetale glavnim ulicama grada, zahtijevajući bolje uslove rada.
Poslije protestne šetnje, koja je trajala nekoliko sati, počeli su prvi incidenti. Oko 200 maskiranih anarhista palilo je autobuse, lomilo izloge trafika, poslovnice banaka postavljajući namještaj iz njih kao barikade. Pokušali su da opljačkaju automate za novac, palili su kante za smeće i bacali bombe ručne izrade na ulaz zgrade u kojoj se nalazi opštinsko vijeće.
Zapaljen je i autobus u prometnoj aveniji Rio Branko, a anarhisti su iznijeli namještaj iz nekoliko banaka i upotrijebili ga kao barikade protiv policije.
Odredi policije za razbijanje protesta koristili su suzavac kako bi rastjerali demonstrante. Jedanaest osoba je uhapšeno, ali brazilski info-sajt Globo navodi da su oni odmah oslobođeni zbog nedostatka dokaza.
"Kad nema policije, nema ni nasilja. Kada oni dođu, onda ono i počne. Ja sam spreman, ne vjerujem im", rekao je anarhista Hugo Krios.
Organizatori demonstracija kažu da je na njima učestvovalo 50.000 ljudi, a policija tvrdi da ih je bilo 10.000.
U Sao Paulu protest u znak podrške nastavnicima takođe je završen napadima na banke, neredima i žestokim okršajima s policijom. Povrijeđeno je sedam osoba, među kojima i četiri policajca.
Prosvjetni radnici iz državnih škola u protekla 53 dana zahtijevaju povećanje primanja. Štrajkom je zahvaćeno 60.000 učenika.
Društvena situacija u Brazilu je napeta poslije nemira koji su u junu potresali zemlju izazvani nezadovoljstvom pretjeranim troškovima u vezi s organizacijom Svjetskog fudbalskog prvenstva 2014. i korupcije javnih funkcionera.