Italija nas očarava ne samo prirodnim ljepotama, umjetnošću i bogatom istorijom, nego i kuhinjom - italijanski specijaliteti, bilo slani ili slatki, osvojili su svjetske meridijane, te je njihova kuhinja nepresušni izvor nadahnuća. A sicilijanski kanoli su jedna od najukusnijih i najpopularnijih poslastica koje stižu iz Italije.
Ime kolačića u prevodu znači "mini tube" i jednostavni su za pravljenje, a predstavljaju male tube napravljene od tijesta, spojene sa delikatesnom kremom. Tijesto se puni smjesom napravljenom od rikota sira, koji se koristi po originalnom receptu, mada nećete pogriješiti ni ako budete koristili maskarpone. Takođe, spajaju se sa različitim ukusima - vanilije, pistaća, narandže, čokolade, badema...
Priča o tome kako je nastala ova poslastica sjajna je gotovo koliko i njihov ukus. Prema jednoj legendi, nastali su za vrijeme dok je Sicilija bila pod arapskom vlašću. Tada su pored vojske u Italju stigli i brojni haremi, a žene iz harema su se dosađivale i tako izmislile ovu poslasticu.
RECEPT
Sastojci:
- 75 g bijelog brašna
- kašika kakao praha
- kašika maslaca otopljenog na sobnoj temperaturi
- 1 jaje
- 0,3 l crnog vina
- 1 kašika šećera
- 100 g šećera u prahu
- 2 kašike mlijeka
- 250 g rikote ili maskarponea
- 2 kašike rendane kore narandže
- ulje
- sjeckani pistaći
Priprema:
Sir sa malo mlijeka izmiješajte pa dodajte šećer u prahu. Dodajte koru narandže, vaniliju ili rendanu čokoladu ako više volite takav ukus. Kada smjesu dobro sjedinite, stavite je u frižider.
U jedan dio brašna dodajte jaje, otopljeni maslac, so i kakao rastopljen u vinu, a zatim ostatak brašna dodajte tako da dobijete tvrdo tijesto. Od tijesta oblikujte loptu, zamotajte je u prozirnu foliju i stavite u frižider na jedan sat.
Kada se tijesto rashladilo, razvucite na debljinu od oko dva mm i isijecite na kvadrate. Modle za kanole, poput onih za šamrolne namažite uljem i na njih uvijte komade tijesta po dijagonali. Kanole pržite u ulju zajedno sa kalupima dok ne postanu zlatnožute boje.
Kada ih izvadite iz ulja, stavite ih na salvetu da se ocijede od viška masnoće, pa kada se prohlade, izvucite kalupe. Zatim ih napunite prethodno pripremljenim nadjevom od sira, te pospite šećerom u prahu.
Pratite nas na našoj Facebook i Instagram stranici, kao i na X nalogu.