Zdravlje

Kako ublažiti opekotine od sunca na prirodan način

Kako ublažiti opekotine od sunca na prirodan način
Foto: Pixabay/Ilustracija | Kako ublažiti opekotine od sunca prirodnim putem

Ako pretjerate sa sunčanjem, ono može da vam prisjedne.

Ali, postoje načini da ublažite neprijatnost i bol izazvanu opekotinama od sunca.   Iako ne postoji mnogo ljudi koji ne vole da osjete sunce na koži, boravak na suncu i te kako ima i negativne posljedice. 

Opekotine su veoma bolne i sprečavaju nas u obavljanju osnovnih aktivnosti, od mobilnosti, preko tuširanja, nošenja odjeće do spavanja.

Najbolji način da spriječite opekotine od sunca jeste da izbjegavate sunčanje u najtoplijem dijelu dana i da nanosite kremu sa zaštitnim faktorom. 

Isto tako, ukoliko imate osjetljivu kožu, birajte hladovinu i nosite adekvatnu odjeću.

Ukoliko pak dođe do opekotina, priroda vam može priskočiti u pomoć, a evo i kako!

Aloe vera

Gel ove biljke ublažava crvenilo i bol i hladi opečeno mjesto. Pored gela, postoje i preparati s raspršivačem koji vam mogu pomoći kada su opekotine bolne na dodir.

Kokosovo ulje

Masti iz ovog ulja štite i omekšavaju kožu zahvaćenu opekotinama. Opečeno mjesto isperite hladnom vodom, a zatim peškirom utapkajte višak tečnosti. Tek onda nanesite kokosovo ulje koje će koža postepeno upiti.

Ovsena kaša

Odgovor na pitanje kako ublažiti opekotine od sunca možete pronaći i u svojoj kuhinji. Naime, ovsena kaša umiruje iritaciju bolnog mjesta. Napravite pastu od ovsene kaže, meda i mlijeka i nanesite na opekotinu. Ostavite da odstoji dok se ne stvrdne, a zatim isperite hladnom vodom.

Paradajz

Paradajz umanjuje iritaciju i bol. Nanesite kriške na bolno mjesto ili ubacite nekoliko paradajza u blender. Tom pastom namažite opekotinu i ostavite da odstoji dok se ne stvrdne. Zatim isperite hladnom vodom.

Soda bikarbona

Soda bikarbona takođe umanjuje bol od opekotine od sunca. Napravite pastu od sode i mlake vode i nanesite na bolno mjesto. Sodu bikarbonu možete dodati i u kadu prilikom kupanja.

Jabukovo sirće

Kupka od jabukovog sirćeta izuzetno je djelotvorna u borbi protiv opekotina. 

Sirće je antiseptik i neupitno rashlađuje kožu dok isparava. Pomaže i da se uspostavi pH ravnoteža, čime ublažava peckanje i žarenje kože. 

Naravno, nemojte sirće stavljati na kažu dok ga ne razblažite sa vodom.

Med

Proizvod pčelinjeg rada cijenjen je zbog djelotvornosti protiv brojnih boljki, uključujući i opekotine od sunca. Nekoliko istraživanja je pokazalo da med ima antibakterijska svojstva i da pomaže pri zarastanju rana.

Nanošenje meda direktno na opekotinu ubrzava epitelizaciju kože, odnosno stvaranje novih ćelija. Namažite medom opečeno mjesto i omotajte ga gazom. Primijenite tretman dva puta dnevno, svaki put sa novom gazom. Možete koristiti čisti med, smjesu meda i mlijeka u omjeru 50:50 ili smjesu meda i limuna u omjeru 80:20.

Nemasno mlijeko i jogurt

Pomiješajte šoljicu hladnog nemasnog mlijeka sa četiri šoljice vode pa dodajte nekoliko kockica leda. U smjesu umočite gazu i napravite oblogu. Stavite oblogu na opečeno mjesto i držite ga 15 do 20 minuta. Ponavljajte svaka dva do četiri časa.

Mlijeko stvara film od bjelančevina koji olakšava pečenje, svrab i bol od opekotine. Jogurt ima sličan učinak. Nanesite jogurt na opečena mjesta. Isperite kožu prohladnom vodom i onda je nježno osušite mekim peškirom.

Vrećice čaja

Ako su vam opečeni očni kapci, umočite vrećice čaja u prohladnu vodu i tako ih namočene položite na zatvorene oči. Čaj sadrži taninsku kiselinu, koja ublažava tegobe izazvane opekotinama.

Možete primijeniti i skuvani crni, zeleni ili mentin čaj. Kada se ohladi, umočite gazu u čaj i napravite oblogu. Taninska kiselina u čaju izvlači vrućinu iz opečene kože i pomaže uspostavaljanje pH ravnoteže.

Zelena salata i krastavac

Skuvajte listiće zelene salate u vodi. Procijedite i ostavite tečnost da se hladi nekoliko časova u frižideru. Umočite vatu u tekućinu i razmažite je po opečenoj koži ili oprezno pritišćite vatom zahvaćeno mjesto.

Krastavci imaju prirodna analgetska i antioksidativna svojstva. Rashladite krastavce i usitnite ih u blenderu dok ne dobijete pastu. Nanesite je na opečena područja, uključujući i lice.

Šta još može pomoći?

Vitamin E može pomoći pri smanjenju upale uzrokovane opekotinom od sunca. Mažite kožu uljem bogatim vitaminom E (npr. uljem pšeničnih klica) ili uzimajte vitamin E kao dodatak prehrani.

Zadovoljite poriv da na opekotinu stavite nešto hladno. Ledeni paket pruža olakšanje kod blažih opekotina. Omotajte ga u vlažnu gazu ili tkaninu i položite ga na opečeno tkivo. Izbjegavajte pjenušave kupke i ne nanosite sapun na opečenu kožu. Ako baš morate upotrijebiti sapun, neka bude najblaži, dječji.

Ako je opekotina jako crvena i bolna ili ako su nastali plikovi, obratite se ljekaru za stručnu pomoć.

Hidratacija

Koža zahvaćena opekotinom je suva, zateže i peče. Stoga je važno da pijete dovoljno tečnosti i da konzumirate namirnice bogate vodom poput lubenica, krastavca, grožđa i narandži. Poenta je da ostanete dobro hidrirani, jer će tako i koža dobiti neopodnu tečnost.

Pratite nas na našoj Facebook i Instagram stranici, kao i na X nalogu.

Izneseni komentari su privatna mišljenja autora i ne odražavaju stavove redakcije Nezavisnih novina.

Najčitanije